امام علی رحمان رییس جمهوری تاجیکستان گفته است که کشورش در نظر دارد تا میزان صادرات برق خود را به افغانستان افزایش دهد.
به گزارش خبرگزاری دید، دفتر مطبوعاتی ریاست اجرایی امروز پنجشنبه (۳۱ جوزا) با نشر خبرنامه‌ای گفت که داکتر عبدالله رییس اجرایی با رییس جمهوری تاجیکستان در شهر دوشنبه دیدار کرد.
داکتر عبدالله در این دیدار گفت که افغانستان خواهان گسترش و تحکیم روابط میان دو کشور است.
وی افزود که در نشست با صدراعظم تاجیکستان توافقنامه٬‌ یادداشت مشترک و اعلامیه‌ای بین دو کشور در حوزه‌های مختلف به امضا می‌رسد.
رییس جمهوری تاجیکستان در صحبت‌های خود خواهان افزایش همکاری‌های اقتصادی و داد و ستد تجارتی میان دو کشور گردید.
آقای رحمان وعده‌ افزایش صادرات برق تاجیکستان به افغانستان را داد و ابراز امیدواری نمود که در عملی ساختن و اجرایی شدن طرح کاسا ۱۰۰۰ گام‌های موثر و عاجل برداشته شود.
امام علی رحمان همچنان خواهان تمدید خط آهن میان دو کشور و اعمار جاده‌های جدید و معیاری برای وصل شدن به آسیای میانه گردید.
وی گفت که افغانستان برای آسیای میانه جایگاه عمده‌ای برای وصل شدن به جنوب آسیا دارد، و خواهان تسهیل این عمل از سوی افغانستان گردید.
رییس جمهوری تاجیکستان خواهان توجه جدی برای اعمار زیربناها در افغانستان و منطقه گردید و ابراز امیدواری نمود که کشورش از طریق افغانستان به پاکستان و بندرهای بین‌المللی وصل گردد.


کد خبر: 31350