کشته‌شدن رهبر تاجیکستانی داعش در حمله به اچین
یک منبع آگاه در تاجیکستان که نخواست نامش فاش شود، روز دوشنبه به بخش تاجیکی رادیو آزادی گفته است، شیر محمد صفروف، یکی از رهبران تاجیکستانی داعش، در حمله اخیر امریکا توسط مادر بمب‌ها در ولسوالی ننگرهار کشته شده‌است.
به گفته این مقام، شیر محمد صفروف تا سال ۲۰۱۶ میلادی در بدخشان پناهگاه داشت و حدود یک سال قبل به عنوان فرمانده تاجیکستانی‌های گروه داعش انتخاب شده بود.
این مقام همچنان گفته است، در مورد هویت ۱۱ تاجیکستانی دیگر نیز تحقیقات ادامه دارد که گفته می‌شود در نتیجه آن حمله کشته شده‌اند.
وزارت دفاع افغانستان نیز گفته است که در نتیجه پرتاب بمب نوع (GBU-43) که آن را مادر بمب‌ها می‌خوانند در ولسوالی اچین ولایت ننگرهار، ده‌ها جنگجوی خارجی به شمول ازبکستانی‌ها نیز کشته شده‌اند. به گفته مقامات امنیتی تاجیکستان، جنگجویان تاجیکستانی نیز در کنار ازبکستانی‌ها می‌جنگند.
