د شهیدانو او لادرکه کسانو وارثانو د حقونو او امتیازاتو د قانون د تعدیلاتو طرحه ترتیب او د نظرونو تر راټولو وروسته به د قانوني پړاونو د ترسره کولو لپاره عدلیې وزارت ته ولېږل شي

د شهیدانو او لادرکه کسانو وارثانو د حقونو او امتیازاتو د قانون د تعدیلاتو طرحه ترتیب او د نظرونو تر راټولو وروسته به د قانوني پړاونو د ترسره کولو لپاره عدلیې وزارت ته ولېږل شي
د شهیدانو او معلولینو په چارو کې د دولت وزیر، چې د حکومت د اطلاعاتو او رسنیو په مرکز کې یې ملت ته د حکومت د حساب ورکولو په پروګرام کې د دغه وزارت لاسته راوړنې او پروګرامونه بیانول، زیاته کړه: په ۱۳۹۷ مالي کال کې په مرکز کې د وثیقو د ثبیت د کمیسیون لخوا د شهیدانو د ورثې ۲۳۹۸ وثیقې تدقیق او څېړل شوي او د نظامي او ملکي شهیدانو د ورثې او معلولینو ۱۷۴۴۴ تنو خپل حقوق تر لاسه کړي دي.
هغه زیاته کړه چې په ۱۳۹۷ کال کې ۴۴۴ تنو د تادیاتو د نظامي، ملکي او افرادو د عمومي مدیریتونو له لارې د حساب د پرانیستنې په موخه مالیې وزارت ته ورپېژندل شوي دي.
همدارنګه د ۱۳۹۷ کال په اوږدو کې څه باندې ۲۰۰۰ نظامي شهیدان ثبت او راجستر او د ملکي شهیدانو څه باندې ۵۰۰۰ ورثه هم بایومټریک شوي دي.
د چاپیریال دوامداره کنټرول او څارنه او روغتیایي مرکزونو ته د ناروغانو ورپېژندل، د ۷ سلنې بهرنیو بورسیو ، له اړوند ارګانونو څخه د شهیدانو د ورثې او معلولینو لپاره د هستوګنې نمرو او اپارټمانونو غوښتنه او د درملنې او معالجې په موخه کورنیو او بهرنیو روغتیایي مرکزونو ته د شهیدانو د ورثې او معلولینو ورپېژندل په ۱۳۹۷ کال کې د شهیدانو او معلولینو په چارو کې د دولت د وزارت له نورو کړنو څخه دي.
د شهیدانو او معلولینو په چارو کې د دولت وزیر د ۱۳۹۸ کال لپاره د دغه وزارت له پروګرامونو څخه یادونه وکړه او ویې ویل، چې د شهیدانو ورثې او معلولیت لرونکو وګړو ته د حقونو ورکړه، د بایو مټریک الکترونیکي سیستم پلي کول، په مرکز او ولایتونو کې د شهیدانو ورثې د وثیقو څېړنه، د شهیدانو د ورثې او معلولینو د حقونو د ورکړې بانکي کول او د شهیدانو د ورثې او معلولینو لپاره د ملاتړ صندوق د طرحې ترتیبول، د هغو مهم اهداف جوړوي.
د شهیدانو او معلولینو په چارو کې د دولت وزارت له شپږو میاشتو څخه را پدېخوا تر همدې نوم لاندې خپل فعالیتونه تظیم او پیل کړي دي.


کد خبر: 4096