اعلامیه نشست سازمان همکاری شانگهای: در افغانستان حکومت فراگیر تشکیل شود

خبرگزاری دید: رهبران کشورهای عضو سازمان همکاری شانگهای، پس از نشست دو روزه در سمرقند، با صدور اعلامیه مشترک، بر ایجاد حکومت فراگیر در افغانستان تاکید کرده‌اند.

اعضای سازمان همکاری شانگهای روز جمعه (۲۵ سنبله) با صدور یک اعلامیه مشترک، تشکیل یک حکومت همه‌شمول و فراگیر با حضور همه گروه‌های قومی، مذهبی و سیاسی را برای منطقه «بسیار مهم» عنوان کرده‌اند.
در اعلامیه آمده است که حل زودهنگام چالش حاکمیت در افغانستان، یک عامل مهم در تقویت امنیت کشور‌های عضو این سازمان است.
گفتنی است که سران کشور‌های عضو سازمان همکاری شانگهای، پس از نشست امروز در سمرقند، به طور مشترک این اعلامیه را صادر کرده‌اند.
ازبیکستان میزبان این نشست، گفته است که این اعلامیه، رویکرد مشترک همه کشور‌های عضو برای تضمین ثبات منطقه است.
گفتنی است که در این نشست رییس‌ جمهورهای کشورهای ایران روسیه، چین، قزاقستان، قرقیزستان، تاجیکستان، ازبیکستان و نخست‌وزیران هند و پاکستان حضور داشتند.