سفیر چین در افغانستان اعلام کرد کشورش در نظر دارد تا با ساخت جاده ولسوالی اشکاشم ولایت بدخشان تا مرز تاجیکستان، این ولایت را به چین وصل کند.
یاو جینگ، سفیر جمهوری خلق چین در کابل امروز در دیدار از ولایت بدخشان در شمال افغانستان گفت: قصد داریم با ساخت جاده ولسوالی اشکاشم ولایت بدخشان تا مرز تاجیکستان، این ولایت را به چین وصل کنیم.
وی با بیان این‌که کار ساخت مسیر مذکور به زودی آغاز خواهد شد، افزود: چین آماده است تا در انتقال لین‌های فیبر نوری به ولایت بدخشان نیز با دولت افغانستان همکاری کند.
طبق گزارش خبرگزاری آناتولی، سفیر چین در جریان سفرش به فیض‌آباد در پاسخ به درخواست احمد فیصل بیگ‌زاد، والی ولایت بدخشان اعلام کرد: با این ولایت در بخش‌های آموزش، تحصیلات عالی، کشاورزی و بهداشت همکاری خواهیم کرد. برای دانشجویان بدخشان نیز بورسیه‌های جداگانه تحصیلی را در نظر گرفته‌ایم.
گفتنی است که این اولین بار است که یک دیپلومات بلندپایه چین به ولایت بدخشان افغانستان سفر می‌کند.
