تاجیکستان از موضع حکومت افغانستان در روند صلح پشتیبانی می‌کند
امام علی رحمان رییس جمهور تاجیکستان در دیدار با زلمی خلیلزاد نماینده ویژه امریکا در امور صلح افغانستان گفته است که کشورش از موضع حکومت افغانسان برای برقراری صلح و ثبات در این کشور حمایت می‌کند.
به نقل از آسیا پلس، زلمی خلیلزاد نماینده ویژه امریکا در امور صلح افغانستان امروز دوشنبه(۱۴ میزان) که در یک سفر کاری به تاجیکستان رفته با امام علی رحمان رییس جمهور تاجیکستان در مورد روند صلح افغانستان و همکاری‌ها بین ایالات متحده و تاجیکستان بحث و تبادل نظر کردند.
در این دیدار، رییس جمهور تاجیکستان با استقبال از روند مذاکرات میان‌افغانی گفته است که کشورش از موضع حکومت افغانستان برای برقراری صلح و ثبات در این کشور حمایت می‌کند.
دو جانب همچنان در مورد همکاری‌های توسعه‌‌ای بین تاجیکستان و امریکا در روشنایی گفت‌وگوهای صلح افغانستان و وضعیت فعلی امنیتی در منطقه صحبت کردند.
مبارزه علیه تروریزم، افراط‌گرایی، قاچاق مواد مخدر و چالش‌ها و تهدیدات جدید از جمله موضوعات مورد بحث آقای خلیلزاد با رییس جمهور تاجیکستان خوانده شده است.
