داکتر عبدالله به ازبیکستان رفت

رییس شورای عالی مصالحه ملی در راستای جلب حمایت از تلاش‌های صلح، عصر امروز سه‌شنبه (۲۰ عقرب) در رأس یک هیئت بلندرتبه به ازبیکستان رفت.

به گزارش خبرگزاری دید، شورای عالی مصالحه ملی در اعلامیه‌ای گفته است که داکتر عبدالله عبدالله به دعوت رسمی حکومت جمهوری ازبیکستان، به شهر تاشکند رفته است.
در اعلامیه گفته شده که آقای عبدالله در جریان این سفر با رییس ‌جمهوری، معاون نخست‌وزیر، وزیر خارجه، رییس بورد اسلامی، رییس کمیسیون امور دینی جمهوری ازبیکستان و شماری دیگر از مقام‌های بلندرتبه این کشور دیدار می‌کند.
طبق معلومات شورای عالی مصالحه ملی، عبدالله در دیدار با رهبران جمهوری ازبیکستان درباره‌ روند صلح افغانستان و حمایت منطقه‌ای از تلاش‌های صلح در افغانستان بحث و گفت‌وگو می‌کند.
عبدالله پیش از این به‌منظور جلب حمایت منطقه‌ای از روند صلح، به پاکستان، هند و ایران نیز سفر کرده بود.