رهبران تاجیکستان و قزاقستان در مورد اوضاع افغانستان گفت‌وگو کردند
امامعلی رحمان رییس جمهور تاجیکستان طی تماس تیلفونی با همتای قزاق خود در مورد روابط دوجانبه، اوضاع افغانستان و روند صلح تبادل نظر کرد.
به نقل از اکی پرس، امامعلی رحمان رییس جمهور تاجیکستان به تازگی در تماس تیلفونی با قاسم توکایف رییس جمهور قزاقستان در باره روابط دوجانبه، مسایل منطقه‌ای و بین‌المللی، اوضاع فعلی افغانستان و روند صلح گفت‌وگو کرده است.
رییس جمهور تاجیکستان با اشاره به اوضاع فعلی افغانستان با همتای قزاق خود در مورد احتمال کمک به آغاز روند مذاکرات میان‌افغانی و بدتر شدن وضعیت امنیتی بخش‌های شمالی افغانستان رایزنی کرده است.
دو طرف همچنان پیرامون روابط دوجانبه، مسایل منطقه‌ای و بین‌المللی، هماهنگی‌های نزدیک بین نهادهای دو کشور و همکاری‌های چندجانبه صحبت کردند.
این در حالی است که با متوقف بودن روند صلح، وضعیت امنیتی مناطق شمالی افغانستان وخیم شده است.
