رییس‌جمهور غنی به زودی تاجیکستان می‌رود
ارگ ریاست جمهوری اعلام کرد که رییس‌جمهور غنی با امام علی رحمان رییس‌جمهور تاجیکستان گفت‌وگوی تیلفونی داشته و قرار است که آقای غنی به تاجیکستان سفر کند.
به گزارش خبرگزاری دید، ریاست جمهوری امروز دو‌شنبه (۳ سنبله) طی خبرنامه‌ای اعلام کرد که سران دو کشور افغانستان و تاجیکستان در این مکالمه تیلفونی، در مورد روابط دوجانبه به ویژه در خصوص تجارت، ترانزیت، تقویت هر چه بیشتر همکاری‌های منطقه‌ای و افزایش همکاری‌ها در امتداد سواحل دریای آمو، صحبت کردند.
رییس‌جمهور غنی گفت که سرحد افغانستان و تاجیکستان به نقطۀ دوستی و پیشرفت مبدل می‌گردد و نمونۀ دوستی و همکاری خوب میان دو کشور همسایه خواهد بود.
امام علی رحمان رییس جمهور تاجیکستان از پروسه صلح به رهبری و مالکیت حکومت افغانستان حمایت قوی کرد و ضمن حمایت از موقف رییس جمهور، وعده داد که تاجیکستان در نشست‌های منطقه‌ای و بین‌المللی، در کنار افغانستان خواهد بود و از موقف حکومت افغانستان حمایت می‌نماید.
رییس جمهور امام علی رحمان از رییس جمهور غنی به خاطر گسترش روابط دوجانبه و چندین جانبه و توسعه همکاری‌ها، دعوت کرد که به تاجیکستان سفر نماید.
هر دو جانب توافق کردند که تحت ریاست محمد حنیف اتمر سرپرست وزارت امور خارجه، هیئت بین‌الوزارتی در روزهای نزدیک به تاجیکستان سفر نماید و روی آجندای نشست رؤسای جمهور تاجیکستان و افغانستان به خاطر همکاری‌های بیشتر، کار کند.
