رییس جمهور غنی به تاجیکستان رفت
رییس جمهور اشرف غنی در رأس یک هیئت بلندپایه دولتی به منظور اشتراک در نهمین کنفرانس وزیران خارجه قلب آسیا – روند استانبول به تاجیکستان رفت.
به گزارش خبرگزاری دید، ریاست جمهور در اعلامیه امروز دوشنبه(۹حمل) خبر داد که رییس جمهور غنی در یک سفر دو روزه به دوشنبه پایتخت تاجیکستان سفر کرده است.
در اعلامیه ارگ آمده است که آقای غنی در جریان این سفر دو روزه ضمن اشتراک و سخنرانی در کنفرانس یادشده، با امام‌علی رحمان رییس جمهور تاجیکستان، نخست‌وزیر و رییس مجلس نمایندگان آن کشور نیز دیدار می‌کند.
طبق اعلامیه ارگ، در این دیدارها قرار است در مورد گسترش مناسبات و همکاری‌ها میان دو کشور در عرصه‌های مختلف بحث و گفت‌وگو شود.
همچنان در اعلامیه آمده است که رییس جمهور غنی در جریان این سفر در دانشگاه ملی تاجیکستان سخنرانی می‌کند که سند دوکتورای افتخاری نیز از سوی رییس این دانشگاه به آقای غنی اعطا خواهد شد.
پیش از این، رییس جمهور غنی از سوی امام‌علی رحمان رییس جمهور تاجیکستان به سفر به آن کشور دعوت شده بود.
