رییس جمهور تاجیکستان برای احمد شاه مسعود نشان درجه یک اسماعیل سامانی را اعطا کرد
رییس جمهور تاجیکستان امام علی رحمان، در فرمانی به مناسبت سی‌امین سالگرد استقلال کشورش، برای احمد شاه مسعود وزیر دفاع دولت اسلامی و قهرمان ملی کشور، نشان درجه یک اسماعیل سامانی را اعطا کرد.
در فرمان آقای رحمان درج شده: «مطابق ماده ۶۹ قانون اساسی تاجیکستان فرمان می‌دهم: به افتخار سی سالگی استقلال دولتی جمهوری تاجیکستان، سابق وزیر دفاع جمهوری اسلامی افغانستان، قهرمان ملی افغانستان احمد شاه مسعود برای مساعدت و میانجیگری به برگزاری مذاکرات بین تاجیکان در سال‌های ۱۹۹۳ – ۱۹۹۶و سهم بزرگ در روند استقرار صلح در جمهوری تاجیکستان با نشان اسماعیل سامانی درجه ۱ سرفرار گردانده شود.»
این فرمان در زبان فارسی با دو الفبای سیریلیک و فارسی در صفحه رسمی دولت جمهوری تاجیکستان منتشر شده است.
قابل ذکر است که احمد شاه مسعود در دوره جنگ داخلی تاجیکستان در دهه نود میلادی میان طرف‌های متخاصم میانجیگری جدی نموده و هردو طرف را در میز مذاکره حاضر کرد.
