قطع شبکه‌های مخابراتی به دستور طالبان در بادغیس

مسئولان ریاست مخابرات بادغیس می‌گویند که پس از تهدیدات گروه طالبان از چند روز به این‌سو از طرف شب فعالیت شبکه‌های مخابراتی روشن، افغان‌بیسیم، اتصالات و ام تی ان در این ولایت قطع می‌شود و تنها شبکه مخابراتی سلام فعال است.

مسئولان ریاست مخابرات بادغیس می‌گویند که پس از تهدیدات گروه طالبان از چند روز به این‌سو از طرف شب فعالیت شبکه‌های مخابراتی روشن، افغان‌بیسیم، اتصالات و ام تی ان در این ولایت قطع می‌شود و تنها شبکه مخابراتی سلام فعال است.
عزیزالله صابری سرپرست ریاست مخابرات بادغیس می‌گوید، در حال حاضر فعالیت چهار شبکه مخابراتی خصوصی از ساعت ۶ شام تا ۶ صبح در سراسر این ولایت قطع می‌شود.
به گفته آقای صابری، طالبان به بخش امنیتی این شبکه‌های مخابراتی خصوصی در کابل هشدار داده‌اند که باید این شبکه‌ها تنها ۱۲ ساعت در روز فعالیت داشته باشند. هنوز علت این کار طالبان روشن نیست.
شماری از فعالان مدنی و باشنده‌گان بادغیس در نشست خبری می‌گویند، قطع فعالیت شبکه‌های مخابراتی در این ولایت کاروبار مردم را صدمه می‌زند و از دولت می‌خواهند تا هرچه زودتر این مشکل را حل سازد.
فیض‌ محمد میرزا زاده معاون والی بادغیس می‌گوید که از حکومت مرکزی خواسته‌اند تا این مشکل را به زودی حل کند.
طالبان ماه پیش نیز فعالیت شبانه شبکه‌های مخابراتی را در ولایت بادغیس قطع کرده بودند که پس از چند روز فعالیت این شبکه‌های مخابراتی به حالت عادی برگشت.