امام علی رحمان بر تشکل دولت فراگیر انتخابی در افغانستان تاکید کرد
خبرگزاری دید: رییس جمهور تاجیکستان می‌گوید برای حل بحران افغانستان، یک حکومت فراگیر انتخابی تشکیل شود. او در مجمع عمومی ملل متحد گفت به کار‌های داخلی افغانستان دخالت نمی‌کند؛ اما همه قشر‌ها باید در حکومت سهیم باشند.
امام علی رحمان رییس جمهور تاجیکستان تاکید کرد که راه حل بحران در افغانستان ایجاد یک دولت فراگیر با حضور همه اقوام از طریق انتخابات است.
امام‌علی رحمان می‌گوید، تاجیکان افغانستان که ۴۶ درصد جمعیت آن کشور را تشکیل می‌دهند حق دارند تا از جایگاه شایسته برخوردار باشند.
رییس جمهور تاجیکستان پیش از این نیز خواستار تشکیل حکومت فراگیر در افغانستان با حضور تاجیک‌ها شده و تاکید کرده بود که حکومت تک‌قومی طالبان هرگز مورد تایید دولت دوشنبه قرار نخواهد گرفت.
عمران خان نخست‌وزیر پاکستان به تازگی گفته است که پس از مذاکرات با کشورهای عضو سازمان شانگهای و همسایگان افغانستان به ویژه تاجیکستان او رسماً مذاکره با طالبان را در مورد حکومت فراگیر در افغانستان که اقوام تاجیک، هزاره و ازبک را هم شامل شود، آغاز کرده است.
