اعلام همکاری روسیه با تاجیکستان برای مقابله با تهدیدات ناشی از افغانستان

خبرگزاری دید: سفیر روسیه در دوشنبه گفته مسکو آماده است با تاجیکستان در مقابله با تهدیدات ناشی از افغانستان همکاری کند.

به نقل از تاس، سمیون گریگوریف سفیر روسیه در تاجیکستان روز گذشته گفته که روسیه از کار مقامات تاجیکستان در سرکوب عرضه مواد مخدر از افغانستان و نظارت بر اوضاع این کشور بسیار قدردانی کرده و گفته آماده همکاری با دوشنبه در چارچوب سازمان همکاری شانگهای (SCO) برای یافتن روش‌های جدید مقابله با تهدیدات است.

گریگوریف: ما از کار جانب تاجیکستان در نظارت بر اوضاع افغانستان، تلاش‌های ملی برای جلوگیری از جریان ایدئولوژی افراطی و مبارزه با قاچاق مواد مخدر از خاک افغانستان بسیار قدردانی می‌کنیم. ما آماده همکاری با دوشنبه در چوکات سازمان همکاری شانگهای هستیم تا بتوانیم سازوکارهای جدید موثر برای مقابله با تهدیدات در این مسیر پیدا کنیم.

این دیپلمات روسیه خاطرنشان کرده که مسکو همچنین از دیگر ابتکارات امامعلی رحمان رییس جمهور تاجیکستان در سازمان همکاری شانگهای حمایت می‌کند.

وی افزوده است: من می‌خواهم به سخنان رییس جمهور رحمان اشاره کنم که این منطقه آسیای مرکزی است که باید هسته اصلی سازمان همکاری شانگهای باشد. روسیه در این موضع و در چارچوب روابط با تاجیکستان و سایر کشورهای آسیای مرکزی متحد مشترک است.