امنیت مرزهای منطقه محور رایزنی فرمانده سنتکام با مقامات تاجیکستان

خبرگزاری دید: رییس فرماندهی مرکزی ایالات متحده در ادامه سفرهایش به کشورهای آسیای مرکزی، در دیدار با مقامات بلندپایه تاجیکستان در مورد امنیت مرزهای این کشور با افغانستان تبادل نظر کرد.

اداره فرماندهی مرکزی ایالات متحده (سنتکام) به تازگی با نشر بیانیه‌ای گفته است که جنرال مایکل کوریلا فرمانده سنتکام در دیدار با مقامات بلندپایه تاجیکستان روی «مسایل مهم امنیتی» گفت‌وگو کرده است.
جنرال کوریلا پس از این دیدار در بیانیه‌ای گفته است که امریکا آماده است نیروهای امنیتی تاجیکستان را برای دفاع از مرزهایش آموزش دهد و تجهیز کند.
وی در سفر دو روزه‌اش به دوشنبه، با رییس ‌جمهور و مقامات ارشد امنیتی تاجیکستان درباره «مسایل مهم امنیتی» از جمله بهبود امنیت مرزهای این کشور رایزنی کرده است.
جنرال کوریلا امنیت مرزهای تاجیکستان را حیاتی خوانده و گفته است: مرزهای قوی تاجیکستان برای امنیت کل آسیای مرکزی حیاتی است.

فرمانده سنتکام همچنین تصریح کرده که همکاری امنیتی با نیروهای امنیتی تاجیکستان بر مبارزه با تروریزم و عملیات‌های امنیتی مرزی متمرکز است.
وی پیش از این با مقامات ازبیکستان و قیرقیزستان نیز دیدار و گفت‌وگو کرده است.
این مقام بلندپایه نظامی امریکا هدف سفر خود را به کشورهای آسیای مرکزی چنین توصیف می‌کند: هدف من ایجاد روابط با رهبران آسیای مرکزی است تا بتوانیم بحث‌های سازنده‌ای در مورد اینکه چگونه ایالات متحده می‌تواند از امنیت آسیای مرکزی حمایت و امنیت منطقه و جهان را از تهدیدات احتمالی تضمین کند.