هشدار تاجیکستان از وخیم‌تر شدن اوضاع افغانستان

خبرگزاری دید: رییس جمهور تاجیکستان در نشست سران کشورهای آسیای میانه در شهر چلپون قیرقیزستان گفته است که اوضاع افغانستان وخیم‌تر خواهد شد.

به نقل از اکی پرس، امامعلی رحمان رییس جمهور تاجیکستان امروز پنجشنبه(۳۰ سرطان) در چهارمین نشست مشورتی سران کشورهای آسیای مرکزی خاطرنشان کرده است که وضعیت افغانستان وخیم‌تر خواهد شد.
رهبر تاجیکستان می‌گوید که تحولات افغانستان نه تنها بر آسیای مرکزی تأثیر منفی می‌گذارد، بلکه ممکن منجر به تغییراتی در موازنه جئوپولیتیکی و نیروها در سراسر قاره اوراسیا شود.
به گفته وی، از زمانی که طا-لبان در افغانستان به قدرت بازگشته اند، «مقامات طا-لبان برای متقاعد کردن جامعه جهانی و مردم افغانستان در مورد مشروعیت قدرت شان، توانایی کنترول اوضاع این کشور و تامین امنیت شهروندان اقدامی نکرده‌ و مسایل اجتماعی و اقتصادی نوظهور را نتوانسته حل کنند».
رحمان افزوده است: برعکس، به‌رغم وعده‌ها و تضمین‌ها، طا-لبان با ایجاد دولتی با مشارکت گسترده همه نیروهای سیاسی و قومی مخالف است.
به نظر او، حکومت موقت طا-لبان به شکل کنونی قادر به حل مشکلات و اداره کشور نیست.
رهبر تاجیکستان بیان داشته است: در عین حال، طا-لبان سیاست تهاجمی تبعیض‌آمیز علیه گروه‌های مختلف قومی اتخاذ کرده و محافظه‌کاری شدید مذهبی را دنبال می‌کنند.