امریکا ممکن به تاجیکستان اجازه دهد هواپیماهای افغانستان را نگه دارد

خبرگزاری دید: یکی از فرماندهان نظامی امریکا گفته است که کشورش ممکن به تاجیکستان اجازه دهد تا هواپیماهای نظامی اهدایی ایالات متحده به افغانستان را حفظ کند.

به نقل از رویترز، پس از سقوط کابل در ماه اگست، ده‌ها هواپیما و هلیکوپتر نظامی افغانستان هنگام فرار خلبانان از طا-لبان به تاجیکستان و ازبیکستان برده شدند.
طا-لبان از دو کشور خواسته‌ که این هواپیماها را پس دهند.
جنرال مایکل کوریلا رییس فرماندهی مرکزی ایالات متحده به تازگی از تاجیکستان دیدن کرد.
وی در اظهاراتی که از سوی سفارت ایالات متحده منتشر شد، گفته است: ما از نیروهای مسلح جمهوری تاجیکستان به خاطر تداوم تأمین امنیت هواپیماهایی که نیروی هوایی افغانستان در ماه اگست گذشته به این کشور آوردند، سپاس‌گزاریم.
کوریلا افزوده است: ایالات متحده برای استفاده مؤثر و نگهداری این هواپیماها با دولت تاجیکستان کار می‌کند.
این جنرال امریکایی گفته است که این هواپیماها قطعاً به افغانستان بازگردانده نخواهد شد، زیرا آن‌ها متعلق به طا-لبان نیستند.
وی بیان داشته است: امید ما این است که بتوانیم بخشی یا تمام هواپیماها را به دولت تاجیکستان تحویل دهیم. من جدول زمانی مشخصی در مورد این اتفاق ندارم، اما سخت تلاش می‌کنیم تا این اتفاق بیفتد.
طا-لبان در حالی قدرت را به دست گرفتند که ایالات متحده و متحدانش نیروهای خود را پس از یک جنگ ۲۰ ساله که در هفته‌های پس از حملات ۱۱ سپتمبر ۲۰۰۱ آغاز شد، خارج کردند.