امنیت مرزی؛ تاجیکستان ٢ پاسگاه در ختلان افتتاح کرد

خبرگزاری دید: با توجه به تنش‌های مرزی و نگرانی‌های امنیتی، تاجیکستان ٢ پاسگاه در نزدیک مرز افغانستان افتتاح کرد.

امامعلی رحمان رییس جمهور تاجیکستان روز گذشته در منطقه شهر توس ولایت ختلان این کشور و در نزدیک مرز افغانستان دو پاسگاه را افتتاح کرده است.

در خبرنامه‌ای که در ویبسایت ریاست جمهوری این کشور منتشر شده آمده است که نیروهای مرزی این کشور با «شجاعت و فداکاری» از مرزها دفاع می‌کنند.

این پاسگاه‌ها همزمان با ٢٩ اُمین سالگرد تشکیل نیروهای مرزی تاجیکستان ایجاد شده و به مدرن‌ترین تجهیزات نظامی مجهز هستند.

این در حالی است که رییس جمهور تاجیکستان بارها از فعالیت گروه‌های تروریستی در مرزهای این کشور هشدار داده و گفته بود که با کمک کشورهای مختلف مرزهای خود را تقویت خواهد کرد.