تاجیکستان بر اهمیت ایجاد دولت فراگیر در افغانستان تاکید کرد

نماینده دایم تاجیکستان در سازمان ملل بر اهمیت ایجاد دولت فراگیر در افغانستان تأکید کرد. تاجیکستان پیش از این هم در مورد تشکیل حکومت فراگیر در افغانستان موضع گرفته است.

به نقل از خاور، جانی‌بیک حکمت نماینده دائم تاجیکستان در نیویارک در برنامه گفت‌وگوی‌های تعاملی با موضوع افغانستان شرکت و سخنرانی کرد.
شرکت کنندگان این نشست، به ویژه، پیامدهای اوضاع به وجود آمده برای زنان، دختران و اقلیت‌های ملی افغانستان و همچنین مانیتورینگ حقوق بشر و انتقام جویی را بررسی کردند.
این رویداد توسط نمایندگی‌های دائمی کانادا و انگلستان در سازمان ملل متحد برگزار شد.
نماینده دایم تاجیکستان در ملل متحد ضمن بیان موضع کشورش در مورد وضعیت افغانستان بر اهمیت ایجاد دولت فراگیر با در نظر گرفتن منافع همه اقلیت‌های ملی این کشور تاکید کرد.