تاجیکستان به سازمان شانگهای: در اطراف افغانستان «کمربند امنیتی» ایجاد کنید

خبرگزاری دید: وزیر خارجه تاجیکستان با ابراز نگرانی در مورد قاچاق مواد مخدر خواستار ایجاد کمربند امنیتی در اطراف افغانستان شده است.

تاجیکستان از کشورهای عضو سازمان همکاری شانگهای (SCO) خواسته است تا یک نهاد مستقل برای مبارزه با قاچاق مواد مخدر از افغانستان ایجاد کنند.

سراج‌الدین مهرالدین وزیر امور خارجه تاجیکستان در نشست وزرای خارجه سازمان همکاری شانگهای در گوای هند گفته که ایجاد یک «کمربند ایمنی» در اطراف افغانستان مهم است.

گفتنی است که این پیشنهاد چند روز پس از کشته شدن یک افسر تاجیکستانی در درگیری بین نیروهای دولتی و قاچاقچیان در منطقه خودمختار گورنو بدخشان (GBAO) به تاریخ ٢٩ اپریل ارایه شده است.