تاجیکستان بیش از ۳ هزار تن مواد به زلزله زدگان هرات کمک کرد
خبرگزاری دید: جمهوری تاجیکستان بیش از ۳ هزار و ۳۰۰ تن مواد شامل چادر، پوشاک، نوشیدنی و خوراک برای زلزله زدگان هرات کمک کرده است.
محمد ظاهر اغبر سفیر نظام پیشین در دوشنبه با همرسانی این مطلب گفته که کمک مذکور به دستور امامعلی رحمان رییس جمهور تاجیکستان صورت گرفته است.
آقای اغبر در توییتی نگاشته است: به اساس هدایت جناب عالی امام علی رحمان ريس جمهور تاجكستان بیش از سه هزار و سه صد تن مواد از جمله خیمه‌ها، بسترهای خواب، آب آشامیدنی، کمپل وغیره مواد اولیه ضروری که در حدود ۱۲۰ موتر باربری می‌شود به آسیب دیدگان زمین لرزه هرات فرستاده شد.
اغبر افزوده که «به نمایندگی از مردم افغانستان از احساس نیک مردم تاجیکستان و تصمیم دولت تاجیكستان قدردانی و تشکر می‌کنیم».
تاجیکستان تنها کشور همسایه افغانستان است که با کابل پس از ۱۵ اگست هیچ نوع رابطه ندارد. این کشور شدیداً مخالف سلطه طا-لبان است.
