تاجیکستان خواستار ایجاد کمربند امنیتی در اطراف افغانستان شد

خبرگزاری دید: مقامات بلندپایه تاجیکستان با ابراز نگرانی نسبت به رشد تروریزم و افراط‌گرایی در منطقه، خواستار همکاری کشورهای جهان و ایجاد کمربند امنیتی در اطراف افغانستان شد.

امامعلی رحمان رییس جمهور تاجیکستان در «کنفرانس همکاری بین‌المللی و منطقه‌ای امنیت و مدیریت مرزها برای مقابله با تروریزم و جلوگیری از تحرک تروریستان» که از روز سه شنبه به این طرف در شهر دوشنبه جریان داشت، سوق و اعزام تندروان از شرق میانه و تقویت صفوف آنان در افغانستان را تهدید جدی برای کشورهای منطقۀ آسیای مرکزی توصیف کرد.
رحمان با اشاره به مرز ۱ هزار و ۴۰۰ کیلومتری بین افغانستان و تاجیکستان که بخش زیاد آن دشوارگذر است، بر اتخاذ تدابیر جدی مرزی تاکید کرد و گفت که در دو سال گذشته تاجیکستان ۱۷۵ پاسگاه مرزی در امتداد مرز با افغانستان بنا کرده و قرار است در آینده ۳۰۰ ایستگاه دیگر ایجاد کند.
او سایر کشورهای منطقه را ترغیب کرد تا این ابتکار تاجیکستان را تطبیق کرده و برای جلوگیری و کاهش تهدیدات، مفکورۀ ایجاد «کمربند امنیتی» در اطراف افغانستان را عملی کنند. افزون بر ایران و پاکستان، افغانستان با کشورهای ازبیکستان و ترکمنستان هم مرز بوده و مرز کوتاهی در ساحۀ واخان با چین دارد.
امامعلی رحمان گفته است که تروریستان و بنیادگرایان با استفاده از نهادهای امدادرسان به «مهاجران و پناهجویان» زیر نام مهاجر و پناه‌جو به کشورهای دیگر رخنه پیدا می‌کنند. او گفت که با توجه به این وضعیت باید «ارزش‌های بشری و حقوق بشر، مجزا از تروریزم و افراط‌گرایی» بررسی شده و به گفتۀ وی به عاملان دهشت افگنی پناه داده نشده بلکه آنان بازداشت و پیگرد شوند.
رییس جمهور تاجیکستان در ادامه بیان داشته است: باید تاکید کرد که در شرایط کنونی انتقال جنگجویان تروریستی از مناطق جنگ‌زده خاورمیانه به مناطق دیگر و تقویت مواضع سازمان‌های تروریستی بین‌المللی در افغانستان تهدید جدی برای کشورهای آسیای میانه است.
وی اتخاذ تدابیر جمعی و همکاری سازنده جامعه بین‌المللی را تنها راه اصلی برای مقابله موثر با تروریزم دانست.
در همین حال، رمضان رحیم‌زاده وزیر داخلۀ تاجیکستان گفته است که طا-لبان به ۳ هزار نفر از «اعضای گروه‌های تروریستی» پاسپورت توزیع کرده و به گفتۀ وی گروه‌های تروریستی در شمال افغانستان و در نزدیکی مرز با تاجیکستان مستقر شده‌اند.
رحیم‌زاده در این کنفرانس گفته است: هم اکنون گروه‌های تروریستی از جنوب و شرق افغانستان در نزدیکی مرز تاجیکستان-افغانستان مجدداً مستقر شده‌اند.
این سومین کنفرانس سطح بالا است که توسط دولت تاجیکستان با همکاری سازمان ملل متحد، اتحادیه اروپا، سازمان امنیت و همکاری اروپا (OSCE)، قطر، عربستان سعودی و سایر شرکای بین‌المللی در دوشنبه دایر شده است تا با تروریزم مقابله شود.