تاکید بر افزایش تجارت و ارتباط در دیدار رهبران تاجیکستان و پاکستان

خبرگزاری دید: شهباز شریف، نخست‌وزیر پاکستان، خواستار افزایش تجارت، سرمایه‌گذاری و ارتباط بین پاکستان و تاجیکستان شد.

به نقل از رادیو پاکستان، شهباز شریف روز گذشته در کنفرانس خبری مشترک با امامعلی رحمان رییس جمهور تاجیکستان در دوشنبه بر لزوم همکاری بیشتر در زمینه‌های مختلف مانند کشاورزی، آموزش، بهداشت و تجارت تاکید کرد.
شریف گفته است: امروز تفاهم‌نامه‌های متعددی بین دو کشور امضا شد که در پیشبرد روابط ما موثر خواهد بود.
وی بر اهمیت قرارداد مشارکت استراتژیک تاکید کرده و به تاجیکستان به دلیل نقش‌اش در تقویت روابط “برادرانه” و گسترش همکاری‌ها تبریک گفت.
نخست وزیر پاکستان همچنین بر ضرورت اتصال ریلی تاجیکستان، افغانستان و بندر کراچی برای تقویت تجارت و همگرایی منطقه‌ای پافشاری کرده است.
شریف در خصوص همکاری‌های دوجانبه خاطرنشان کرده است: پیش‌بینی می‌شود پروژه کاسا-۱۰۰۰ در سال آینده تکمیل و موجب رونق منطقه شود.
او در دیدار با رییس جمهور تاجیکستان در مورد دهلیز چین-تاجیکستان و افغانستان گفت‌وگو کرد.
در زمینه مبارزه با تروریزم، نخست‌وزیر پاکستان به فداکاری‌های پاکستان و تاجیکستان اشاره کرده و بر تعهد پاکستان به تلاش‌های جمعی علیه تروریزم تاکید کرده است.
او گفته است: پاکستان آماده ارایه همکاری در زمینه مبارزه با تروریزم است.
رییس جمهور تاجیکستان نیز بر روابط صمیمانه و برادرانه پاکستان و تاجیکستان تاکید کرده است.
رهبران دو کشور راه‌های تقویت همکاری‌ها در زمینه‌های مختلف و بهبود ارتباط و پیوندهای منطقه‌ای بین مردم را به بحث و بررسی گرفتند.
نخست‌وزیر پاکستان با دعوت از رهبری تاجیکستان برای سفر به پاکستان گفته است: پاکستان پتانسیل بسیار زیادی برای سرمایه‌گذاری خارجی در بخش‌های مختلف دارد.