ذبیح‌الله امانی، سخنگوی والی سرپل به رسانه‌ها می‌گوید که گروه تروریستی داعش در این ولایت در حال سربازگیری است.
به گزارش خبرگزاری دید، سخنگوی والی سرپل همچنان می‌گوید، با آن‌که ولایت سرپل با تهدیدات فزاینده امنیتی مواجه است، اما طی ۱۶ ماه گذشته هیچ عملیات نظامی برای سرکوب این گروه در این ولایت، راه‌اندازی نشده‌است.
وی همچنان هشدار می‌دهد که اگر حکومت برای سرکوب گروه‌های تروریستی اقدام نکند، وضعیت سرپل در بهار آینده، وخیم‌تر می‌شود.
امانی افزوده است که مقام ولایت سرپل، بارها از حکومت مرکزی تقاضای راه‌اندازی عملیات نظامی را داشته است، اما حکومت مرکزی هیچگونه اقدامی نکرده‌است.
سرپل از جمله ولایت‌های ناامن کشور است که گروه‌های شورشی دست‌کم در چهار ولسوالی آن حضور دارند؛ مسئله‌ای که نگرانی شهروندان این ولایت را نیز به دنبال داشته است.
