داکتر عبدالله به تاجیکستان رسید
داکتر عبدالله رییس اجرایی حکومت وحدت ملی در یک سفر رسمی دو روزه به دعوت قاهر رسول‌زاده نخست وزیر تاجیکستان وارد این کشور شد.
به گزارش خبرگزاری دید، دفتر مطبوعاتی ریاست اجرایی، امروز چهارشنبه (۳۰ جوزا) با نشر خبرنامه‌ای گفت که داکتر عبدالله جهت اشتراک در کنفرانس بین‌المللی تحت عنوان «آب برای توسعه پایدار» وارد تاجیکستان شده است.
در این سفر، عبدالله افزون بر سخنرانی در کنفرانس بین‌المللی «آب برای توسعه پایدار» که هدف آن استفاده خوب و مدیریت آب برای توسعه پایدار است، با امام علی رحمان رییس جمهور، قاهر رسول‌زاده نخست وزیر و رییس پارلمان جمهوری تاجیکستان دیدار و ملاقات می‌کند.
رییس اجرایی کشور در حاشیه این سفر با رییس جمهوری ترکمنستان، رییس جمهوری پاکستان و تعداد دیگر از مقامات این کشورها دیدار می‌کند.
در این سفر موافقتنامه همکاری در عرصه مخابرات، یادداشت تفاهم همکاری در زمینه معادن و اعلامیه مشترک میان مقامات افغانستان و جمهوری تاجیکستان به امضا می‌رسد و هر دو طرف روی گسترش روابط دوجانبه، تقویت همکاری‌های امنیتی، اقتصادی، اجتماعی، فرهنگی، تجارت، ترانزیت و مبارزه مشترک با تروریزم بحث و گفت‌وگو می‌کنند.
در این سفر برخی مقامات بلند پایه حکومتی از جمله وزیر امور داخله ویس احمد برمک، رییس اجرایی را همراهی می‌کنند.
