داکتر عبدالله در مسایل صلح مقام دوم کشور است/ جایگاه معاون اول در قانون اساسی محفوظ است
ریاست جمهوری با نشر خبرنامه‌ای گفته است که بر بنیاد توافق سیاسی میان رییس جمهور و داکتر عبدالله، آقای عبدالله در مسایل مربوط به روند مصالحه ملی جایگاه مقام دوم کشور را دارد، در غیر آن جایگاه معاون نخست ریاست جمهوری محفوظ است.
به گزارش خبرگزاری دید، ارگ ریاست جمهوری با نشر خبرنامه‌ای، اعلام کرده که داکتر عبدالله به عنوان رییس شورای مصالحه، در مسایل مربوط به روند صلح جایگاه مقام دوم کشور را دارد، ولی در غیر آن مطابق قانون اساسی کشور جایگاه دوم معاون اول ریاست جمهوری محفوظ است.
در اعلامیه آمده: بر اساس توافق سیاسی زیر چتر قانون اساسی میان رییس جمهوری اسلامی افغانستان و رییس شورای عالی مصالحه ملی، محترم داکتر عبدالله عبدالله از نظر تشریفات و پرتوکول در مسایل مربوط به مصالحه ملی جایگاه مقام دوم کشور را دارا می‌باشد.
اما ارگ تاکید کره که «قانون اساسی جمهوری اسلامی افغانستان مقام دوم کشور را برای معاون اول ریاست جمهوری محفوظ ساخته است».
با این حال، امروز رییس جمهور غنی و داکتر عبدالله توافقنامه‌ای را امضا کردند که بر بنیاد آن، بحران چند ماهه سیاسی به پایان رسید.
