رؤسای جمهور روسیه و تاجیکستان وضعیت افغانستان را بررسی کردند

خبرگزاری دید: رؤسای جمهور روسیه و تاجیکستان در یک گفتگوی تیلفونی با بررسی وضعیت افغانستان، درباره گسترش همکاری‌های دوجانبه برای تامین امنیت منطقه تبادل نظر کردند.

ولادیمیر پوتین و امامعلی رحمان رهبران تاجیکستان و روسیه می‌گویند که هزاران جنگجوی داعش و دیگر گروه‌های تروریستی در افغانستان حضور دارند.
امامعلی رحمان می‌گوید افزایش فعالیت‌ گروه‌های تروریستی، از جمله داعش در افغانستان منجر به ناامنی در کشورهای آسیای میانه می‌شود.
به گفته وی، از نیمه دوم آگست سال ۲۰۲۱ هزاران نفر از اعضای داعش، القاعده، انصارالله و حزب التحریر از زندان‌های افغانستان آزاد شدند.
آقای پوتین نیز بر این باور است که شمال افغانستان به پناهگاه داعش و القاعده تبدیل شده است.
رییس جمهور تاجیکستان به کشورهای آسیای میانه هشدار داده که حضور تروریست‌ها در افغانستان ممکن است منجر به افراطی‌ترین اقدامات شود.
آقای رحمان قرار است در نشست آتی سران سازمان همکاری شانگهای که ماه سپتمبر در سمرقند برگزار می‌شود درباره افغانستان نیز صحبت کند.
به نوشته رسانه‌های روسی زبان، در نشست پیش رو علاوه بر رییس جمهور تاجیکستان، احتمالاً روسای جمهور روسیه، چین، هند، پاکستان، ایران، ترکیه، قزاقستان، قرقیزستان و ازبیکستان حضور خواهند داشت.