رایزنی رهبران روسیه و تاجیکستان در مورد وضعیت افغانستان

امامعلی رحمان رییس جمهور تاجیکستان در تماس تیلفونی با ولادیمیر پوتین همتای روسی‌اش در باره اوضاع افغانستان و همکاری‌های دوجانبه تبادل نظر کرد.

به نقل از آی‌کی‌آی، امامعلی رحمان رییس جمهور تاجیکستان روز گذشته طی تماس تیلفونی با ولادیمیر پوتین رییس جمهور روسیه پیرامون مسایل منطقه‌ای و بین‌المللی، وخیم‌شدن وضعیت نظامی و سیاسی افغانستان، به شمول اوضاع ولایت‌های شمال و شمال شرق افغانستان گفت‌وگو کرده است.
کرملین در بیانیه‌ای در رابطه به گفت‌وگوی رهبران دو کشور گفته است: (دو طرف) به تفصیل روی وضعیت پیچیده مرز تاجیکستان-افغانستان که از تشدید تقابل مسلحانه در افغانستان، به شمول مناطق مرزی ناشی شده، صحبت کردند.
روسای جمهور دو کشور بر اهمیت تقویت همکاری‌ها نیز پافشاری کردند.
ولادیمیر پوتین همچنین گفته، مسکو آماده فراهم کردن حمایت‌های لازم به تاجیکستان در قالب روابط دوجانبه و سازمان پیمان امنیت جمعی است.
این در حالی است که بر بنیاد گزارش‌ها، تاجیکستان حدود ۲۰ هزار نیرو به مرز خود با افغانستان اعزام کرده است.