رایزنی رهبران فرانسه و تاجیکستان در مورد تحولات افغانستان
خبرگزاری دید: روسای جمهور تاجیکستان و فرانسه طی تماس تیلفونی در مورد وضعیت افغانستان تبادل نظر کردند.
دفتر مطبوعاتی ریاست جمهوری تاجیکستان به تازگی در بیانیه‌ای اعلان کرده است که امامعلی رحمان رییس جمهور این کشور و امانوئل مکرون رییس جمهور فرانسه طی تماس تیلفونی در باره روابط دوجانبه، وضعیت افغانستان و تقویت همکاری‌ها صحبت کرده‌اند.
طرفین در مورد وضعیت نظامی، سیاسی، اجتماعی و اقتصادی افغانستان رایزنی کردند.
امامعلی رحمان و امانوئل مکرون بر لزوم اقدامات مشترک با هماهنگی جامعه جهانی برای تسهیل صلح و ثبات در افغانستان نیز تاکید کرده‌اند.
دو طرف همچنان تضمین امنیت منطقه‌ای و مقابله مشترک با تهدیدات و چالش‌های مدرن مانند تروریزم، افراط‌گرایی و قاچاق مواد مخدر را مورد بحث قرار داده‌اند.
گفتنی است که تاجیکستان و کشورهای آسیای مرکزی نسبت به وضعیت وخیم افغانستان و امکان سرایت آن به کشورهای همسایه ابراز نگرانی کرده‌اند.
