سرپرست وزارت خارجه به تاجیکستان رفت

وزارت امور خارجه اعلام کرد که محمد حنیف اتمر سرپرست این وزارت در راس یک هیئت بلند پایه به تاجیکستان رفته است.

به گزارش خبرگزاری دید، وزارت امور خارجه امروز پنج‎شنبه(۲۷ سنبله) طی خبرنامه‎ای اعلام کرد که محمدحنیف اتمر سرپرست این وزارت در راس یک هیئت بلندپایه دولتی به تاجیکستان رفته است.
طبق اعلام وزارت خارجه، این سفر دو روزه به دعوت رسمی وزارت خارجه تاجیکستان انجام شده است.
وزارت خارجه گفته است که آقای اتمر در این سفر با امام علی رحمان رییس جمهور، قاهر رسول‌زاده نخست‌وزیر، سراج‌الدین مهرالدین وزیر خارجه و سید مؤمن یتیم‌اوف رییس کمیته‌ دولتی امنیت ملی تاجکستان دیدار می‌کند.
طبق اعلام وزارت خارجه، بحث‌ها و مذاکرات روی تقویت هرچه بیش‌تر روابط دو کشور در بخش‌های امنیتی و مرزی، ترانسپورت، سرمایه‌گذاری، تجارت، ترانزیت و انرژی متمرکز خواهد بود.
حنیف اتمر را در این سفر شماری از مقامات دولتی، والیان و اعضای مجلس نمایندگان همراهی می‌کنند.