پیلوت‌های گیرمانده در تاجیکستان به کمک امریکا منتقل شدند
خبرگزاری دید: گزارش‌ها حاکی است که دست‌کم ۱۴۳ پیلوت گیر مانده افغانستان در تاجیکستان به کمک امریکا از این کشور منتقل شده‌اند.
خبرگزاری رویترز، روز سه‌شنبه(۱۸ عقرب) گزارش داده است که پیلوت‌ها و خدمه هواپیما که در تاجیکستان در بازداشت به سر می‌بردند، توسط امریکا از این کشور خارج شده‌اند.
پیش از این گزارشی نشر شد که ۱۴۳ پیلوت و خدمه هواپیما که در نخسین روز سقوط نظام به تاجیکستان رفته بودند، در بازداشت در آن کشور به سر می‌برند.
وضعیت اسفبار پیلوت‌های افغان در تاجیکستان و افغانستان در کانگرس امریکا مورد بحث قرار گرفته بود.
به گزارش رویترز، یکی از پیلوت‌ها با نشر تصویری از هنگام سوار شدنش به هواپیما، نوشته است که مقصد آنان امارات متحده عربی است.
این در حالی است که در پی تحولات اخیر سیاسی در کشور، شماری از نظامیان از جمله پیلوت‌ها و خدمه‌های پرواز نیروهای هوایی کشور با خانواده‌های‌شان از ترس کشته شدن یا به کشورهای دیگر پناهنده شده‌اند و یا هم پنهان هستند.
