کانادا ۳۲۶ پناهجوی افغانستانی را از تاجیکستان انتقال داد

خبرگزاری دید: وزارت مهاجرت کانادا از انتقال ۳۲۶ پناهجوی افغانستانی از تاجیکستان به این کشور خبرداد.

این پناهجویان روز چهارشنبه(۲۰ میزان) توسط یک پرواز ویژه از تاجیکستان انتقال یافته‌اند.
شان فریزر وزیر مهاجرت کانادا در توییتی نوشت تا کنون افغان‌هایی که به کانادا رسیده‌اند به ۲۱ هزار و ۷۰۰ تن می‌رسد.
کانادا سال گذشته اعلام کرد که ۴۰ هزار شهروند افغانستان در معرض خطر را می‌پذیرد.
این کشور‌ دو هفته پیش نیز، ۳۰۰ پناهجوی افغانستانی را از تاجیکستان انتقال داده بود.
کانادا در ماه‌های اخیر روند انتقال پناهجویان افغانستانی را به این کشور افزایش داده است.
هفته‌های قبل در چندین پرواز اختصاصی، صدها شهروند افغانستان را از اسلام‌آباد پاکستان خارج کرد.
شماری از شهروندان افغانستان که مجبور به ترک کشور شده‌اند، در کشورهای‌ دومی انتظار انتقال به کشورهای امریکایی و اروپایی را می‌کشند.