گفت‌وگوی امنیتی هرات؛ کاردار سفارت امریکا وارد تاجیکستان شد
خبرگزاری دید: کاردار سفارت امریکا برای افغانستان از سفرش به تاجیکستان جهت شرکت در گفت‌وگوی امنیتی هرات خبر داد.
کرن دیکر کاردار سفارت امریکا برای افغانستان امروز سه‌شنبه(۸ قوس) در چند رشته توییت گفت که برای شرکت در نشست امنیتی هرات به تاجیکستان سفر کرده است.
کاردار سفارت امریکا با اشاره به دو دور سفرش به تاجیکستان در دهه ۸۰ و در سال ۲۰۰۱ پس از حملات ۱۱ سپتمبر، می‌گوید که در دور جدید سفرش گذشته و آینده ذهنش را به خود مشغول کرده است.
وی گفت‌وگوی امنیتی هرات را فرصت عالی برای تبادل نظر در مورد وضعیت افغانستان با نمایندگان افغانستان، تاجیکستان، کشورهای منطقه و اتحادیه اروپا خواند.
خانم دیکر افزوده است که حمایت قوی امریکا را در حمایت از مردم افغانستان در صلح با خود و همسایگانش تکرار خواهد کرد.
گفتنی است که گفت‌وگوی امنیتی هرات قرار است امروز در تاجیکستان دایر شود.
