سفر پنهانی/ توافقات مهم سران استخبارات تاجیکستان و حکومت‌سرپرست چه بود؟
خبرگزاری دید: اخیرا خبری منتشر شد مبنی بر اینکه سید مومن یتیموف رئیس کمیته دولتی امنیت ملی تاجیکستان در یک سفر غیر‌رسمی و مخفیانه به کابل رفته و با ملا عبدالحق وثیق رئیس استخبارات حکومت سرپرست دیدار کرده است. گرچه مفاد و تواققات انجام شده میان سران استخبارات تاجیکستان و حکومت سرپرست به صورت رسمی منتشر نگردید اما رسانه‌های نزدیک به حکومت سرپرست به تازگی جزئیاتی را درباره این دیدار منتشر کرده‌اند.
به نقل از رسانه‌های نزدیک به حکومت سرپرست در دیدار سران استخبارات تاجیکستان و حکومت سرپرست، روی استقرار چند دیپلمات از سوی کابل در شهر دوشنبه پایتخت تاجیکستان توافق شده است.
همچنین در این دیدار درباره توقف کامل فعالیت‌های نیروهای مخالف حکومت سرپرست در تاجیکستان رایزنی صورت گرفته است .گرچه فعالیت جریان‌های مخالف حکومت طالبان پیش از این نیز از سوی حکومت دوشنبه محدود شده بود.
پس از تسلط دوباره طالبان بر افغانستان، شماری از نظامیان پیشین و مخالفان سیاسی حکومت سرپرست به تاجیکستان پناه بردند. در حال حاضر شماری از رهبران جبهه مقاومت ملی افغانستان در تاجیکستان زندگی می‌کنند.
در بخشی از محتوای منتشر شده از سوی رسانه‌های نزدیک به حکومت سرپرست درباره این دیدار آمده است که دو طرف درباره رسانه ” آمو” نیز مذاکراتی را داشته‌اند. گرچه در این باره جزئیات بیشتری منتشر نشده است اما به نظر می‌رسد که حکومت سرپرست در تلاش محدود ساختن فعالیت رسانه آمو می باشند و تلاش دارند تا این رسانه مخالف خود را محدود نمایند.
همچنین در این دیدار رئیس کمیته امنیت ملی تاجیکستان آقای یتیموف به مقامات حکومت سرپرست اطمینان داده است که هیچ فعالیتی جهت حمایت از دا/عش در تاجیکستان انجام نمی‌شود و وعده داده است که برای مبارزه با گروه دا/عش همکاری منسجمی را با حکومت سرپرست خواهد داشت.
پیش از این و با افزایش فعالیت داعش خراسان در افغانستان، مقام‌های طالبان کشورهای همسایه افغانستان از جمله تاجیکستان را به حمایت از دا/عش متهم کردند.
