نگرانی تاجیکستان از افزایش سربازگیری جوانان تاجیک در گروه‌های افراطی مذهبی
خبرگزاری دید: بیش از هزار و ۸۰۰ کارمند دولتی در منطقه ختلان در جنوب تاجیکستان بسیج شده‌اند تا خانه به خانه رفته و به مردم از احتمال پیوستن به گروه‌های افراطی مذهبی هشدار دهند.
تاجیکستان هشدار داده که تعداد جوانان تاجیک که توسط افراط‌گرایان مذهبی آنلاین استخدام شده‌اند، به گونه نگران‌کننده‌ای افزایش یافته است.
به گفته ساکنان ختلان، در جریان این گفت‌وگوهای غیررسمی، مقامات از مردم می‌خواهند که در برابر گروه‌هایی که به دنبال سربازگیری جوانان برای سازمان‌های تروریستی تحت پوشش اسلام هستند، هوشیار باشند.
بعد از این‌که ده‌ها شهروند تاجیکستان با حملات تروریستی مرگبار و طرح‌ریزی برای چنین حملات در روسیه، ایران، ایالات متحده و اروپا در سال جاری مرتبط دانسته شدند، دوشنبه نسبت به افزایش افراط‌گرایی مذهبی ابراز نگرانی کرد.
علی سعید، والی ختلان در ماه آگست گذشته به خبرنگاران گفته است: اطلاعاتی که ازسازمان‌های تنفیذ قانون می‌گیریم، نگران کننده است.
وی بدون ارایه آمار دقیق، افزوده که تعداد جوانانی که به گروه‌های تندرو مذهبی پیوسته‌اند، دراین ولایت بسیار زیاد است.
