همکاری امنیتی تاجیکستان و روسیه بر افغانستان متمرکز است

خبرگزاری دید: صادق امام، معاون وزیر امور خارجه تاجیکستان در نشست میان‌پارلمانی تاجیکستان و روسیه گفته که همکاری امنیتی بین مسکو و دوشنبه بیشتر بر مسئله افغانستان متمرکز است.

صادق امام گفته است که تعامل امنیتی بین کشورهای ما بیشتر بر مشکل افغانستان متمرکز است.

به گفته وی، وضعیت افغانستان پس از خروج ائتلاف غرب نگران کننده است و روندهای در حال ظهور در این کشور بسیار متناقض است.
وی خاطرنشان کرده که ایدیولوژی رادیکالیزم مذهبی روندهای امنیتی منطقه را به‌طور جدی تحت تاثیر قرار می‌دهد، بنابراین نباید در مورد اهداف آنها [مقامات افغانستان] توهم داشت.

این دیپلمات ارشد تاجیکستان افزوده است: روند گسترش فعالیت گروه‌های افراطی تروریستی و افزایش قاچاق مواد مخدر نگران کننده است.
به نقل از تاس، وی تاکید کرده است که به همین دلیل است که کشورهای ما توافق دارند که گفت‌وگوی مسالمت‌آمیز با هدف تشکیل یک دولت فراگیر با مشارکت نمایندگان همه نیروهای سیاسی و قومی افغانستان، تضمین مهمی برای گذار این کشور به توسعه صلح‌آمیز است.

معاون وزیر امور خارجه تاجیکستان خاطرنشان کرده که تاجیکستان در ارایه کمک به مردم رنج‌کشیده افغانستان اشتراک دارد.
تاجیکستان برای افغانستان مایحتاج اولیه، در درجه اول غذا و برق را تامین می‌کند و فعالیت بازارچه‌های مرزی را با افغانستان احیا کرده است.
وی گفته که تقویت بخش‌هایی از مرز تاجیکستان-افغانستان در سال ۲۰۲۴ تکمیل خواهد شد.