پذیرش دیپلمات طالبان در تاجیکستان

خبرگزاری دید: منابع خبری اعلام کردند دولت تاجیکستان با پذیرش یک دیپلمات طالبان در سفارت افغانستان در دوشنبه موافقت کرده است.

این منابع همچنین گفته‌اند: وزارت خارجه تاجیکستان به «ظاهر اغبر» سفیر افغانستان نیز تفهیم کرده تا امور سفارت را با دیپلمات طالبان یکجا به پیش ببرد.

این در حالی است که پیش از این سفارت افغانستان در دوشنبه امور خود را در هماهنگی با «امرالله صالح» معاون اول رئیس‌جمهوری سابق پیش می‌برد و دولت دوشنبه نیز از پذیرش دیپلمات طالبان سر باز زده بود.

ماه عقرب سال گذشته، امیرخان متقی وزیر خارجه گروه طالبان در نامه ای خطاب به سفارت افغانستان در دوشنبه، فردی به نام «فیض الله» را به عنوان منشی اول هیأت دیپلماتیک طالبان در تاجیکستان معرفی کرده بود.

محمد ظاهر اغبر سفیر دولت پیشین افغانستان در پی دریافت این نامه، آن را در برابر دوربین خبرنگاران پاره کرده و گفته بود که تا برقراری یک حکومت عادل و فراگیر از سفارت افغانستان نگهبانی خواهد کرد.

دولت تاجیکستان یا طالبان تاکنون دراین‌باره اظهار نظر نکرده‌ است.