خبرگزاری دید: مصور بهادری، رئیس کمیته مهاجرت افغانستان (آریانا) در تاجیکستان، از اخراج مهاجران افغانستانی از این کشور ابراز نگرانی کرد و از مقامات خواست از حقوق پناهندگان محافظت و به تعهدات بین‌المللی پایبند باشند.
مصور بهادری در بیانیه اخیر خود به خانواده‌های افغانستانی آسیب‌دیده از این اخراج‌ها تسلیت گفته و بر تعهد این کمیته برای حمایت از مهاجران تاکید کرده است.
به نقل از تایمز آف سنترال آسیا، وی خاطرنشان کرده که روند اخراج، که بیش از یک هفته ادامه دارد، باعث نگرانی گسترده در میان جمعیت پناهجو شده است.
حمایت از حقوق پناهندگان
کمیته مهاجرت افغانستان که بیش از ۲۷ سال است در تاجیکستان فعالیت می‌کند، به‌عنوان واسطه بین پناهجویان افغانستان و مقامات محلی عمل می‌کند.
این کمیته که تحت چارچوب قانونی وزارت عدلیه تاجیکستان فعالیت دارد، به نگرانی‌های مهاجران رسیدگی و گفت‌وگو با نهادهای دولتی را تسهیل می‌کند.
بهادری از تاجیکستان خواسته تا به تعهدات بین‌المللی‌اش احترام بگذارد.
بسیاری پناهجویان افغانستانی در تاجیکستان از آزار و اذیت طالبان فرار کرده و پناهندگی دریافت کرده‌اند.
پیشنهادها برای راه‌حل‌های جایگزین
بهادری رویکردهای جایگزین نسبت به اخراج پیشنهاد کرد که شامل موارد ذیل است:
- مذاکره با سازمان‌های بین المللی یا کشورهای ثالث برای تسهیل انتقال پناهجویان افغانستان؛
- ساده‌سازی فرآیند جابه‌جایی برای دسترسی بیشتر به اسکان مجدد؛
- به جای اخراج افراد به مکان ناامن، جریمه یا حبس را به‌عنوان مجازات جرایم معرفی شود.
کمیته مهاجرت افغانستان همچنین به مقامات تاجیکستان اطمینان داده که پناهجویان افغانستانی به قوانین و آداب و رسوم محلی احترام خواهند گذاشت.
این کمیته متعهد شد که با نیروهای امنیتی تاجیکستان برای رسیدگی به فعالیت‌های مکرر غیرقانونی توسط افراد از طریق اقدامات قانونی همکاری کند.
فراخوان راه‌حل‌های دیپلماتیک
بهادری بیانیه‌اش را با حمایت از راه‌حل‌های دیپلماتیک برای محافظت از مهاجران آسیب‌پذیر افغانستان و در عین حال حفظ روابط قوی بین افغانستان و تاجیکستان خاتمه داده است.
وی بر لزوم تلاش‌های مشترک برای حمایت از حقوق بشر و تضمین امنیت پناهندگان تاکید کرده است.