مبارزه با تروریزم؛ محور رایزنی پاکستان و تاجیکستان

خبرگزاری دید: محمد عاصم مالک، رئیس سازمان اطلاعاتی پاکستان (آی‌اس‌آی) در سفری به تاجیکستان با امامعلی رحمان، رئیس جمهور تاجیکستان ملاقات و درباره موضوعات مود علاقه تبادل نظر کرد.

دفتر ریاست جمهوری تاجیکستان به تازگی اعلام کرد که در این دیدار که بر وضعیت کنونی و چشم‌انداز آینده روابط سیاسی تاجیکستان و پاکستان به‌ویژه در زمینه‌های صلح، ثبات و امنیت منطقه‌ای و همچنین بررسی سایر موضوعات کلیدی همکاری‌های دوجانبه تاکید شد.

رئیس جمهور تاجیکستان از روابط سیاسی سازنده بین دو ملت ابراز خرسندی و از سطح بالای اعتماد متقابل قدردانی کرد.
رهبر تاجیکستان با تاکید بر مشارکت در مسایل امنیتی، تماس‌های منظم بین آژانس‌های ذیربط دو کشور را برای دو طرف مفید دانسته است.

بر اساس گزارش‌ها، دو طرف بر لزوم تقویت همکاری در مبارزه با تروریزم، افراط‌گرایی، رادیکالیزم، قاچاق مواد مخدر، جنایات فراملی و سایر موضوعات مورد علاقه دوجانبه تاکید کردند.

به نقل از اکونومیک تایمز، محمد عاصم مالک، که قبلاً در ستاد فرماندهی عمومی در راولپندی خدمت می‌کرد، روز گذشته به جای جنرال ندیم انجم، رییس آی‌اس‌آی، نقش جدیدش را بر عهده گرفت.