مسکو: روسیه و تاجیکستان با تهدیدهای مشترک از افغانستان روبرو هستند

خبرگزاری دید: سفیر روسیه در تاجیکستان گفته است که در بحبوحه وضعیت پیچیده افغانستان و افزایش فعالیت‌های گروه‌های تروریستی جهانی در ولایت‌های شمالی این کشور، تعامل با تاجیکستان عامل مهمی در حفظ ثبات آسیای مرکزی است.

سمیون گریگوریف سفیر روسیه در تاجیکستان به رسانه‌های روسیه گفت؛ روسیه و تاجیکستان درک می‌کنند که با تهدیدهای مشترک ناشی از افغانستان روبرو هستند و برای حفظ ثبات در منطقه همکاری می‌کنند.
او گفته است: «مسکو و دوشنبه در درک پیدایش تهدیدهای مشترک ناشی از قلمرو افغانستان متحد هستند.»
به گفته سفیر، تعامل با تاجیکستان در بحبوحه وضعیت پیچیده افغانستان و افزایش فعالیت‌های سازمان‌های تروریستی بین‌المللی در ولایت‌های شمالی، عامل مهمی در حفظ ثبات آسیای مرکزی است.
در اکتوبر ۲۰۲۴، صادق امامی، معاون وزیر امور خارجه تاجیکستان خاطرنشان کرد که همکاری امنیتی تاجیکستان و روسیه “بیشتر بر مشکل افغانستان متمرکز است.”
او رویدادها در این کشور را «بسیار متناقض» خواند.
از میان تمام کشورهای آسیای مرکزی، تاجیکستان طولانی‌ترین مرز را با افغانستان دارد.
به گفته مقامات تاجیکستان، شبه‌نظامیان سازمان‌های تروریستی مختلف از جمله داعش-خراسان، حزب التحریر، جنبش اسلامی ترکستان شرقی، تحریک طالبان پاکستان و غیره در خاک افغانستان فعالیت می‌کنند.
حکومت سرپرست افغانستان بارها اعلام کرده است که گروه‌های تروریستی در این کشور نه حضور و نه فعالیت دارد و این‌که آن‌ها سرکوب شد‌ه‌اند.