خبرگزاری دید: امیرخان متقی، وزیر خارجه طالبان، در دیدار با سعدی شریفی، سفیر تاجیکستان در کابل، بر تمایل «قوی» طالبان برای گسترش روابط با تاجیکستان تأکید کرد. این دیدار روز پنجشنبه ۲۳ دلو در کابل برگزار شد.
متقی با اشاره به «پیوندهای عمیق فرهنگی و زبانی» میان دو کشور گفت که کابل و دوشنبه میتوانند از فرصتهای موجود برای تقویت همکاریهای سیاسی، اقتصادی و تجاری بهرهبرداری کنند و «هیچکس نمیتواند به روابط دوستانه دو طرف آسیب بزند.»
به گفته وزارت خارجه طالبان، سفیر تاجیکستان نیز اعلام کرده که دوشنبه بر اساس «واقعیتهای موجود» به دنبال توسعه مناسبات با کابل است و پروژههای مهم اقتصادی مرزی را با چشمانداز تقویت همکاری با طالبان دنبال میکند.
در این دیدار درباره برگزاری کمیته مشترک اقتصادی، همکاریهای مرزی و امنیتی و برنامهریزی وزارتهای خارجه دو کشور برای سال آینده گفتوگو شده است.
این رایزنیها در حالی انجام میشود که مقامهای تاجیکستان از افزایش درگیریهای مرزی با افغانستان در سال گذشته میلادی خبر دادهاند. همچنین حجم مواد مخدر کشفشده در مرز تاجیکستان و افغانستان در سال ۲۰۲۵ به گفته مقامهای دوشنبه به ۲۷۴۲ کیلو رسیده است.