خبرگزاری دید: وزیر دفاع روسیه اعلام کرد که تقویت امنیت مرز تاجیکستان با افغانستان در اولویت برنامههای دفاعی مسکو قرار دارد و پایگاه نظامی روسیه در تاجیکستان برای مقابله با تهدیدهای خارجی در آمادهباش است.
آندری بلوسوف، وزیر دفاع روسیه، از افزایش همکاریهای امنیتی و نظامی مسکو و دوشنبه خبر داده و بر تقویت مرز تاجیکستان با افغانستان تأکید کرده است.
بلوسوف در مراسمی به مناسبت سیوپنجمین سالگرد استقلال تاجیکستان در مسکو گفت که روسیه در چارچوب سازمان پیمان امنیت جمعی، سازمان همکاری شانگهای و کشورهای مستقل مشترکالمنافع، همکاریهای امنیتی خود را گسترش میدهد و توجه ویژهای به مرز تاجیکستان و افغانستان دارد.
او تاجیکستان را «شریک استراتژیک» روسیه خواند و گفت پایگاه نظامی ۲۰۱ روسیه در تاجیکستان برای مقابله با تهدیدهای خارجی در حالت آمادهباش قرار دارد.
این اظهارات پس از دیدار اخیر ولادیمیر پوتین، رئیسجمهور روسیه، با امامعلی رحمان، رئیسجمهور تاجیکستان، مطرح میشود. پوتین در این دیدار گفته بود که مسکو از نگرانیهای دوشنبه درباره وضعیت افغانستان آگاه است و دو کشور در زمینه تأمین امنیت، تماس نزدیک دارند.
تاجیکستان در ماههای اخیر بارها نسبت به تهدیدهای امنیتی در امتداد مرز حدود ۱۳۰۰ کیلومتری این کشور با افغانستان ابراز نگرانی کرده است. مسکو نیز پس از بازگشت طالبان به قدرت، همکاریهای امنیتی خود با دوشنبه را افزایش داده و نسبت به گسترش ناامنی و تهدیدهای تروریستی از افغانستان به آسیای مرکزی هشدار داده است.
در همین زمینه، سازمان پیمان امنیت جمعی نیز برنامه تقویت مرز تاجیکستان و افغانستان را در دستور کار قرار داده و قرار است تجهیزات نظامی و فنی مورد نیاز برای افزایش توان مرزبانی تاجیکستان فراهم شود.