خبرگزاری دید: لی چیانگ، نخست‌وزیر چین، در دیدار با امامعلی رحمان، رئیس‌جمهور تاجیکستان، خواستار گسترش همکاری‌های امنیتی و استخباراتی دو کشور برای مقابله با تروریزم، افراط‌گرایی و جدایی‌طلبی شد و بر ضرورت حفاظت از شهروندان و شرکت‌های چینی در تاجیکستان تأکید کرد.
این دیدار در دوشنبه و در چارچوب سفر رسمی نخست‌وزیر چین برای شرکت در نشست شورای سران دولت‌های عضو سازمان همکاری شانگهای انجام شد.
لی چیانگ بر افزایش تبادل اطلاعات، هماهنگی‌های امنیتی و همکاری در اجرای قانون تأکید کرد. نگرانی پکن از فعالیت گروه‌های مسلح و احتمال گسترش ناامنی از افغانستان به آسیای مرکزی، از عوامل مهم توجه چین به همکاری با تاجیکستان به شمار می‌رود.
چین و تاجیکستان پیش از این نیز در زمینه امنیت مرزی همکاری داشته‌اند. پکن همچنین خواهان اقدامات بیشتر برای حفاظت از اتباع و شرکت‌های خود در تاجیکستان شده است.
دو طرف در کنار مسائل امنیتی، درباره گسترش همکاری‌های اقتصادی، توسعه زیرساخت‌ها، معادن، اقتصاد دیجیتال و هوش مصنوعی نیز گفت‌وگو کردند.