خبرگزاری دید: سفر غیرمنتظره محمد یوسف وفا، والی حکومت طالبان در بلخ و از نزدیکان رهبر این گروه به تاجیکستان، مرحله تازهای از تعاملات میان دوشنبه و طالبان را رقم زده است. بهگفته ناظران، این دیدار میتواند نشانهای از تغییر تدریجی سیاست تاجیکستان در قبال حکومت طالبان و کاهش حمایت از جبهه مقاومت باشد.
یوسف وفا به دعوت رسمی حکومت تاجیکستان به دوشنبه سفر کرده و با مقامهای ارشد از جمله وزیر اطلاعات و رئیس اداره مرزبانی این کشور دیدار کرده است. دفتر والی بلخ اعلام کرده که در این نشست، دوطرف بر گسترش همکاریهای امنیتی و اقتصادی تأکید کردند. وزیر اطلاعات تاجیکستان نیز تعهد داده که از خاک این کشور هیچ فعالیت ضدطالبانی انجام نخواهد شد.
تحلیلگران میگویند این رویکرد تازه تاجیکستان، نتیجه فشارهای مسکو و ضعف عملی جبهه مقاومت در برابر حکومت طالبان است.
تاجیکستان تاکنون روابط رسمی دیپلوماتیک با حکومت طالبان نداشته و سفارت افغانستان در دوشنبه همچنان در اختیار دولت پیشین است. با این حال، دیدار مقامهای بلندپایه دوطرف نشان میدهد که دوشنبه نیز مانند دیگر همسایگان افغانستان در حال آزمودن سیاست «تعامل بدون بهرسمیتشناسی» با طالبان است؛ روندی که میتواند توازن قدرت در شمال افغانستان و موقعیت جبهه مقاومت را دگرگون کند.