سفر وزیر تجارت طالبان به ازبیکستان

خبرگزاری دید: وزارت صنعت و تجارت حکومت طالبان اعلام کرد که نورالدین عزیزی، وزیر صنعت و تجارت، به‌دعوت رسمی جمهوری ازبیکستان برای اشتراک در نمایشگاه بین‌المللی صنعتی INNOPROM Central Asia عازم این کشور شده‌است.

به گفته این وزارت، این نمایشگاه با هدف توسعه صنعت، تکنالوژی‌های پیشرفته و گسترش همکاری‌ها در بخش سرمایه‌گذاری برگزار می‌شود و در آن مقام‌های دولتی، سرمایه‌گذاران و تولیدکنندگان از چندین کشور، از جمله روسیه، بلاروس، قزاقستان، قرقیزستان و تاجیکستان حضور دارند.

همچنان گزارش شده که بیش از ۶۰ شرکت از افغانستان در بخش‌های مختلف از جمله پنبه، زغال‌سنگ، دوا و محصولات زراعتی در این نمایشگاه اشتراک کرده‌اند.

مسوولان، این نمایشگاه را یکی از بزرگ‌ترین رویدادهای صنعتی، تکنالوژیک و سرمایه‌گذاری در آسیای مرکزی می‌دانند.