خبرگزاری دید: وزارت داخله تاجیکستان از بازداشت ۹ نفر به اتهام عضویت در یک شبکه بین‌المللی قاچاق مواد مخدر خبر داده است. به گفته این وزارت، اعضای این شبکه مواد مخدر را از افغانستان به تاجیکستان انتقال می‌دادند و برای ارسال آن به کشورهای دیگر آماده می‌کردند.
پولیس تاجیکستان اعلام کرد که در جریان بازرسی مخفیگاه این گروه، ۲۴ کیلوگرام چرس کشف و ضبط شده است.
مقام‌های تاجیکستان مظفر اعظموف، ۴۴ ساله، را سرکرده احتمالی این شبکه معرفی کرده‌اند. او در جریان تحقیقات گفته که این گروه از سال ۲۰۲۵ تاکنون، بین ۲۰ تا ۲۵ محموله مواد مخدر به وزن مجموعی حدود ۵۵۰ تا ۶۰۰ کیلوگرام جابه‌جا کرده است.
یکی دیگر از متهمان نیز گفته که برای انتقال هر کیف مواد مخدر از مرز، ۲۵۰۰ دالر به او وعده داده شده بود.
وزارت داخله تاجیکستان نام کشورهای مقصد این محموله‌ها را اعلام نکرده است. به گفته این وزارت، علیه هر ۹ متهم پرونده جنایی تشکیل شده و آنان در بازداشت به‌سر می‌برند. این افراد در صورت اثبات اتهام‌های شان، ممکن است به ۱۲ تا ۲۰ سال زندان محکوم شوند.