دکانداران کابل ۳ هزار افغانی جریمه می‌شوند
شهرداری کابل اعلام کرده است، پس از این دکاندارنی که با گذاشتن اجناس اضافی دکان شان پیاده‌روها را ببندند، سه هزار افغانی جریمه می‌شوند.
به گزارش خبرگزاری دید، عبدالله حبیب‌زی سرپرست شهرداری کابل می‌گوید، در نشست هماهنگی با حضور مدیر ترافیک شهر کابل و مسئولان نواحی این تصمیم گرفته شد.
در حال حاضر اکثر دکانداران در بخش‌های مختلف شهر کابل، با گذاشتن اجناس اضافیشان جلو دکان‌ها، باعث انسداد پیاده‌روها می‌شوند.
سرپرست شهرداری کابل می‌گوید که به هدف ایجاد سهولت برای شهروندان و انسجام امور ترافیک در ناحیه دوم شهر کابل، این جلسه هماهنگی برگزار شده بود.
شهرداری کابل که اخیراً مدیریت ترافیک شهر کابل را نیز به عهده گرفته است ، می‌گوید: ازدحام ترافیکی یکی از چالش‌های عمده شهری در سطح شهر کابل می‌باشد. این مسئله در کنار تلف کردن وقت شهروندان هنگام تردد، نقصان اقتصادی را نیز به همراه دارد.
با این همه، شماری از دکانداران در کابل در واکنش به این تصمیم شهرداری میگویند، حکومت عوض سهولت برای ما محدودیت خلق میکند و زمینه را برای کار و بار تنگتر میسازد.
