ادعای رییس جمهور تاجیکستان: شمال افغانستان محل پرورش تروریزم شده است
خبرگزاری دید: رییس جمهور تاجیکستان در دومین نشست سران آسیای مرکزی و اتحادیه اروپا ادعا کرده که شمال افغانستان به محل پرورش تروریزم جهانی تبدیل شده است.
امامعلی رحمان در این نشست که روز گذشته به میزبانی قرقیزستان دایر شد هشدار داده که افغانستان به ویژه ولایات شمالی آن به محل پرورش تروریزم بین‌المللی تبدیل شده است.
دومین نشست سران آسیای میانه و اتحادیه اروپا روز گذشته در شهر چولپون آتای قرقیزستان برگزار شد.
علاوه بر امامعلی رحمان، روسای جمهور قزاقستان، قرقیزستان، اوزبیکستان، معاون نخست‌وزیر ترکمنستان و رییس شورای اروپا در این نشست حضور داشتند.
امامعلی رحمان به شرکت‌کنندگان گفته است: افغانستان همچنان یکی از بزرگ‌ترین تولیدکنندگان مواد مخدر در جهان نیز است.
به گفته وی، پس از ۲۰۲۱ میلادی، تولید مواد مخدر به طور چشمگیر افزایش یافته است.
رییس جمهور تاجیکستان افزوده که در شرایط کنونی افغانستان، اتخاذ اقدامات مشترک برای مبارزه با تهدید گسترش تروریزم، افراط گرایی، رادیکالیزم مذهبی، جرایم سایبری، قاچاق مواد مخدر و اسلحه را مهم می‌داند.
