اعزام تیم داکتران به بلخ از سوی اوزبیکستان؛ بیماران ۵ روز رایگان معاینه می‌شوند
خبرگزاری دید: اوزبیکستان به درخواست حکومت سرپرست کمک‌های بشردوستانه، شامل غذا، دارو و پزشک به ولایت بلخ افغانستان ارسال کرد.
سرویس مطبوعاتی منطقه سرخان‌دریای اوزبیکستان کمک‌های بشردوستانه، شامل غذا و دارو، همراه با یک «قطار سلامت» به افغانستان فرستاد؛ جایی‌که داکترها بیماران را در ولایت بلخ رایگان معاینه می‌کنند.
این کمک‌ها به درخواست حکومت سرپرست و به‌دستور شوکت میرضیایف رییس جمهور اوزبیکستان به افغانستان ارسال شده است.
علاوه بر این، ساکنان بلخ از ۲۵ تا ۳۰ دسمبر به معاینات صحی رایگان توسط داکتران اوزبیکستانی دسترسی خواهند داشت.
این خدمات از طریق یک «قطار سلامت» متشکل از ۹ واگن صحی و بهداشتی ارایه خواهد شد.
ارسال این محموله توسط اولوغ‌بیگ قاسم‌اف، فرماندار منطقه سرخان‌دریا و نمایندگان وزارت‌خانه‌های حمل و نقل و امور خارجه و راه‌آهن اوزبیکستان تسهیل شده است.
