خبرگزاری دید: کمیته امنیت ملی تاجیکستان اعلام کرد که در پی نفوذ یک گروه مسلح از خاک افغانستان به داخل این کشور، درگیری شدیدی میان نیروهای مرزبانی تاجیکستان و افراد مهاجم رخ داده است که به کشته شدن سه عضو یک سازمان تروریستی و دو مرزبان تاجیکستان انجامید.
بر اساس بیانیه رسمی این نهاد، این درگیری، صبح امروز، پنجشنبه ۴ جدی، در یکی از مناطق مرزی تاجیکستان با افغانستان روی داده است؛ جایی که نیروهای مرزبانی پس از شناسایی تحرکات مشکوک، با گروهی از افراد مسلح که بهصورت غیرقانونی وارد خاک تاجیکستان شده بودند، وارد تبادل آتش شدند.
کمیته امنیت ملی تاجیکستان اعلام کرد که در جریان این درگیری، سه مهاجم مسلح کشته شدند و تلاش آنان برای نفوذ بیشتر به داخل این کشور ناکام ماند. در مقابل، دو نفر از نیروهای مرزبانی تاجیکستان نیز جان باختند.
مقامات تاجیکستان هویت دقیق و نام سازمان تروریستی وابسته به این افراد را اعلام نکردهاند، اما تأکید کردهاند که مهاجمان وابسته به «یک گروه تروریستی فعال در منطقه» بودهاند و این حادثه را تهدیدی جدی علیه امنیت ملی خود دانستهاند.
این رویداد امنیتی در حالی واقع شده که تاجیکستان در ماههای اخیر بارها نسبت به افزایش تهدیدات امنیتی از ناحیه مرزهای افغانستان هشدار داده و خواستار اقدامات جدیتر برای جلوگیری از فعالیت گروههای مسلح در مناطق مرزی شده است.
مقامات امنیتی تاجیکستان اعلام کردهاند که کنترل و تدابیر امنیتی در نوار مرزی تقویت شده و تحقیقات درباره جزئیات این حادثه همچنان ادامه دارد.